Strict Standards: Only variables should be passed by reference in /customers/a/1/3/razzazi.se/httpd.www/inc/functions.inc.php on line 489 Razzazi
Strict Standards: Only variables should be passed by reference in /customers/a/1/3/razzazi.se/httpd.www/inc/show.news.php on line 140 Strict Standards: Only variables should be passed by reference in /customers/a/1/3/razzazi.se/httpd.www/inc/functions.inc.php on line 548 Strict Standards: Only variables should be passed by reference in /customers/a/1/3/razzazi.se/httpd.www/inc/functions.inc.php on line 549 Strict Standards: Only variables should be passed by reference in /customers/a/1/3/razzazi.se/httpd.www/inc/functions.inc.php on line 563 Strict Standards: Only variables should be passed by reference in /customers/a/1/3/razzazi.se/httpd.www/inc/functions.inc.php on line 489

چاوپێکه‌وتن له‌گه‌ڵ ئازادی

1- تکایه‌ له‌ پێشدا به‌ کورتی ئاماژه‌یه‌ک به‌ ژیانی شه‌خسی و هونه‌ریی خۆتان بکه‌ن.
من له‌ دووکان داده‌نیشم و خه‌ریکی هیچ شتێک نیم وه‌کوو ئیش و کار. رۆژانه‌ تۆزێ له‌گه‌ڵ و گوڵ و باخ و بێستان کاتی خۆم به‌سه‌ر ده‌به‌م، ئه‌گه‌ر میوانمان نه‌بێ، پاشان خه‌ریکی کامپیۆته‌ر و ته‌له‌ڤزیۆن و زۆرتریش، هه‌ر گۆڤار و رۆژنامه‌یه‌ک که‌ خۆم به‌ دڵم بن وه‌کوو لڤین و ئاوێنه‌ و هیدیکه‌ ده‌یانخوێمه‌وه‌ و چاو له‌ سایته‌کان ده‌که‌م و کاری دیکه.

2- تا چه‌ند کۆچی دووایی هونه‌رمه‌ندی خوالێخۆشبوو، مه‌رزیه‌ فه‌ریقی، کاریگه‌ریی به‌سه‌ر جه‌نابت و کاره‌کانته‌وه‌ هه‌بووه؟
دیاره‌ کۆچی دوایی مه‌رزیه‌ بێ گاریگه‌ریی نه‌بووه‌ به‌ سه‌ر منه‌وه‌، ژیانم ژیره‌وژوور کرد، خه‌می زۆرم بۆ خوارد، به‌ڵام چه‌که‌رده‌ن کێ دوای کێ ده‌مرێ؟ خه‌م و خه‌فه‌ت و ده‌رد و که‌سه‌ری کۆچی دوایی مه‌رزیه‌ وای لێکردم، ئه‌وه‌نده‌ سیگارم ده‌کێشا که‌ گه‌ییشتبووه‌ رۆژانه‌ چووار پاکه‌ت، تا وای لێهات گه‌رووم تووشی نه‌خۆشیی بوو، پاش ئه‌وه‌ی نه‌شته‌رگه‌رییان بۆ کردم، ئێستا شوکور باشم و دیسان خه‌ریکی ده‌سپێکردنه‌وه‌ی گۆرانیم و (سی دی) تازه‌م به‌ ده‌سته‌وه‌یه‌. هه‌رچه‌ند ژنم هێناوه‌ و ژیانم باشه‌، به‌ڵام تا ماوم له‌بیری ناکه‌م و به‌ یادگارییه‌کانییه‌وه‌ ده‌ژیم.

3- له‌ روانگه‌ی جه‌نابته‌وه‌، هونه‌ری مۆسیقا و گۆرانیی کوردی، له‌م چه‌ند ساڵه‌ی دووایدا چ ئاڵوگۆڕێکی به‌ خۆوه‌ بینیوه‌ و چ داواکاری یان پێشنیارێکت سه‌باره‌ت به‌ کاری هونه‌ریی مۆسیقا و گۆرانیبێژی، بۆ هونه‌رمه‌ندانی کورد به‌گشتی هه‌یه‌؟
به‌ داخه‌وه‌ بۆته‌ پاشاگه‌ردانیی و به‌ره‌و ئاستی خه‌راپ هه‌نگاوی هه‌ڵگرتووه‌، بۆ نموونه‌: من دژ به‌وه‌ نیم‌ هونه‌ری کوردیی گه‌شه‌ بکا و پێش بکه‌وێ، به‌ڵام دژ به‌وه‌م‌ گۆرانیی نه‌کوردیی له‌ وێنه‌ی تورکیی و عه‌ره‌بیی و فارسیی و هیدیکه‌ ده‌قاوده‌ق بدزرێ و بهێنرێته‌ ناو گۆرانیی کوردیی و به‌ تازه‌گه‌ریی و به‌ کاری نوێ له‌قه‌ڵه‌م بدرێ. من دژ به‌وه‌ نیم‌ گۆرانیبێژانی کورد له‌ مۆسیقای و گۆرانیی گه‌لانی دیکه‌ی دنیا که‌ڵک وه‌ربگرن بۆ ده‌وڵه‌مه‌نکردن و به‌جیهانیکردنی مۆسیقا و گۆرانیی کوردیی! با گۆرانیبێژه‌کانمان تێبکۆشن ئاوازی تازه‌ دابنێن، یان له‌ فۆلکلۆری کوردیی که‌ڵک وه‌ربگرن و به‌ سه‌ریه‌وه‌ ئاوازی تازه‌ دابنێن و به‌ تێکه‌ڵکردن له‌گه‌ڵ مۆسیقای رۆژاوایی به‌رهه‌می تازه‌ بخولقێنن، چونکه‌ چووارچێوه‌ی مۆسیقا و گۆرانیی کوردیی، بۆ ئه‌و کاره‌ ده‌ست ده‌دا، ئیتر بۆچی ده‌قاوده‌ق گۆرانییه‌کانی نه‌جات سه‌غیره‌ و سوعاد حوسنی و فه‌رید ئه‌تره‌ش و گۆرانیبێژه‌ عه‌ره‌به‌کانی دیکه‌، ده‌که‌نه‌ کوردیی، ئه‌مه‌ خزمه‌ت نییه‌ و خه‌یانه‌ته‌، ئه‌م شێوازه‌ که‌ به‌ (ئه‌رابێسک) یان (ته‌ره‌ب) ناوی ده‌رکردووه‌، کاتی خۆی تورکه‌کانی تورکیه‌ وه‌کوو شه‌قڵێکی مۆسیقای‌ سه‌رده‌می عوسمانییه‌کان له‌ عه‌ره‌ب وه‌ریان گرت و زیندوو رایانگرت تا ئه‌مڕۆ‌، جا چونکه‌ نه‌یانتوانی بیشارنه‌وه،‌ ناویان نا (ئه‌رابێسک) که‌ له‌ وشه‌ی (Arabish) ی ئینگلیسی که‌وتۆته‌وه‌، به‌ڵام له‌ وڵاتانی عه‌ره‌بی پێیده‌گوترێ: (طرب)، ئه‌مه‌ لاساییکردنه‌وه‌یێکی خه‌ته‌رناک و پڕمه‌ترسییه‌ بۆ دوارۆژی گۆرانیی کوردیی، به‌تایبه‌ت ئه‌م شێوه‌یه‌ی که‌ (کاک هه‌ڵکه‌وت زاهیر) ده‌یکا! له‌ رۆژهه‌ڵاتی ناوه‌ڕاست یه‌که‌مین نه‌ته‌وه‌ که‌ ئه‌م شێوازه‌ی ده‌ست پێکرد، تورکی عوسمانیی بوون، پاشان فارس و ئه‌وسا ره‌گه‌ی هاویشته‌ ناو گه‌لانی دیکه‌ی وه‌کوو ئه‌ڤغانیی و ئازه‌ریی و هیدیکه‌وه‌. ئه‌و گۆرانیبێژانه‌ی له‌ وڵاتی ئێران، به‌م شێوازه‌ گۆرانییان ده‌گوت: تاجیک، جبلی، رۆح په‌روه‌ر، ایرج مهدیان، عباس قادری، ئازیتا، گیتا، جه‌واد یه‌ساری، داوود مقامی و کۆمه‌ڵێکی دیکه‌، ئێستا و ئێستاش گۆرانییه‌کی ئه‌مانه‌ له‌ رادیۆ و ته‌له‌ڤزیۆنی ئێراندا بڵاو نه‌بووه‌وه‌ چونکه‌ ده‌یانگوت زه‌ره‌ره‌ بۆ مۆسیقای ئێرانیی، هه‌رچه‌ند گۆرانییه‌کانیش زۆر به‌ سۆز و به‌ ناوه‌رؤكێش گه‌لێریی بوون.

4- ئێوه‌، خاوه‌ن چه‌ند به‌رهه‌مێکی شۆڕشگێڕیین، چ شتێک هانتاندا به‌لای سروود و به‌گشتی به‌رهه‌می حیماسی و شۆڕشگێڕیدا بڕۆن؟
شۆڕشی کوردستان و خه‌بات بۆ رزگاریی کوردستان وای کرد من به‌ شوێن ئه‌و تێکۆشانه‌دا بڕۆم، به‌ڵام به‌ داخه‌وه‌، ئه‌و خه‌باته‌ی ئێمه‌ کردمان به‌رهه‌می نه‌بوو، چونکه‌ گه‌ییشته‌ ئاستێک که‌ ته‌واوی حیزبه‌کان پارچه‌پارچه‌ بوون و دڵی ته‌واوی خه‌ڵکی کورد و دایکه‌ خاوه‌ن شه‌هیده‌کانی کوردستانیشیان سارد کرده‌وه، هه‌رچه‌ند من سه‌ره‌ڕای ئه‌وه‌ی که‌ ناهومێدم به‌ڵام خه‌باتی هونه‌ریی خۆم هه‌ر رانه‌گرتووه‌ و نه‌وه‌ستاوم‌.

5- وه‌کوو هونه‌رمه‌ندێکی شۆڕشگێڕ که‌ له‌ قۆناخه‌ جیاجیاکانی خه‌باتی رزگاریخوازانه‌ی کورد له‌ رۆژهه‌ڵاتی کوردستاندا، به‌ ده‌نگه‌ خۆش و به‌سۆزه‌که‌ته‌وه‌ وره‌ت به‌ خه‌باتگێڕانی کوردستان به‌خشیوه‌، چۆن ده‌ڕوانیته‌ قۆناخی ئێستای خه‌باتی کورد له‌و به‌شه‌ی نیشتمان و چ ره‌خنه‌ یان خود پێشنیارێکت بۆ لایه‌نه‌ جیاوازه‌کانی سه‌ر گۆڕه‌پانی خه‌بات و به‌ربه‌ره‌کانێی له‌گه‌ڵ داگیرکه‌راندا هه‌یه‌؟
خه‌ڵکی کورد له‌ کوردستانی بنده‌ستی ئێران، خوازیاری ئه‌وه‌یه‌ گیروگرفتی سیاسی، کۆمه‌ڵایه‌تی، ئابووریی، فه‌رهه‌نگیی و هیدیکه‌ی، خۆی چاره‌سه‌ری بکا و که‌س راوێن (تصمیم)ی بۆ نه‌گرێ و بڕیاری بۆ نه‌دا، به‌ڵام هه‌میشه‌ به‌ چه‌ک و فیشه‌ک وه‌ڵامی دراوه‌ته‌وه‌ و به‌ هاووڵاتی پله‌ دوو و سێش دانه‌نراوه‌ و هیچ حیسابێکی بۆ نه‌کراوه و له‌ هوموو بوارێکدا راچاو (کۆنترۆڵ) کراوه و له‌ ژێر چاوه‌دێرییدا بووه‌!
2500 ساڵه‌ کورد بنده‌ستی ده‌سه‌ڵاتی فارسه‌ و به‌ زمانی فارسیی له‌ناومان ده‌به‌ن‌، 2500 ساڵه‌ خه‌ڵکی کورد له‌ کاروباری ناوخۆی نیشتمانه‌که‌ی خۆیدا هیچ نه‌خش و ده‌ورێکی نییه‌ و له‌گه‌ڵ هه‌ر ئێرانییه‌ک‌ قسه‌ ده‌که‌ی، یه‌کسه‌ر به‌ (تجزیه‌ طلب)ت داده‌نێ و به‌ (اقلیت قومی)ت ناو ده‌با، و به‌ مۆسیقاکه‌شمان که‌ له‌ باری پێشینه‌ و مێژووه‌وه‌ زۆر له‌ فارسیی کۆنتره‌، ده‌ڵێن: (موسیقی محلی) و، ده‌یان ناو و ناتۆره‌ی دیکه‌! له‌ کاتێکدا یه‌کێ له‌ کۆڵه‌که‌ گرنگه‌کانی مۆسیقای ئێرانیی و ته‌نانه‌ت فارسیش، مۆسیقای کوردییه‌ و زۆرێک له‌ ژه‌نیاره‌ به‌ناوبانگه‌کانی ئێران کوردن!
ئه‌م بنده‌ستیی و نابه‌رابه‌ریی و سته‌مکاریی و زۆربێژییه‌،‌ خه‌ڵکی کوردی به‌ره‌و خه‌بات و تێکۆشان هانداوه‌ و تووشی کێشه‌ی گه‌وره و سامناکی کردووه‌. به‌شێکی ئه‌م کێشه‌ و گیر و گرفتگه‌له‌، ده‌گه‌ڕێنه‌وه‌ بۆ ئه‌وه‌ که،‌ رێکخراو و حیزبه‌کانی کوردستانی رۆژهه‌ڵات نه‌یانتوانیوه‌ له‌ ماوه‌ی خه‌باتی خۆیاندا کورد به‌ گه‌لانی دیکه‌ی ئێران بناسێنن، تا‌ لانیکه‌م ئاوه‌ها چاومان لێ نه‌که‌ن! فارس زۆر سووک و نزم چاو له‌ کورد و نه‌ته‌وه‌کانی بنده‌ستی ئێران ده‌که‌ن!
حیزب و رێکخراوه‌کانی کوردیش نه‌یانتوانیوه‌ کورد به‌ گه‌لانی دیکه‌ی ئێران بناسێنن که‌ چییان ده‌وێ و‌ وه‌کوو ئۆپۆزیسیۆنیش ئه‌گه‌ر بانگ کرابێتنه‌ ته‌له‌ڤزیۆنه‌ فارسییه‌کان بۆ گوتوبێژ، ته‌له‌ڤزیۆنه‌کانی دیکه‌ با بوه‌ستێ، زمانیان نه‌هاتۆته‌ گۆ بڵێن: ئێمه‌ کوردین، نه‌ته‌وه‌یێکین پێشینه‌مان له سه‌ر ئه‌م خاکه‌ له‌ فارس کۆنتره‌، به‌ڵام هیچ مافێکمان پێ ره‌وا نابینن، زمانه‌که‌مان لێ قه‌ده‌خه‌ کراوه‌ و به‌ هاووڵاتی پله‌ سێشمان نازانن و ئێوه‌ بوونه‌ته‌ هۆ ئێمه‌ به‌ (تجزیه‌ طلب) ناو ببریێن و هه‌ر ئێوه‌شن‌ له‌ داهاتوودا ئێران به‌ره‌و پارچه‌پارچه‌بوون ده‌به‌ن نه‌ک ئێمه‌!

6- له‌ کۆتاییشدا، تکایه‌ وه‌کوو هونه‌رمه‌ندێکی نه‌ته‌وه‌یی که‌ خزمه‌تی به‌رچاوت له‌ بواری هونه‌ر و بواره‌کانی دیکه‌دا به‌ گه‌له‌که‌ت کردووه‌‌، ‌چ په‌یامێکت بۆ خه‌ڵکی خۆشه‌ویستی کورد به‌گشتی و هاوڵاتیانی رۆژهه‌ڵاتی کوردستان به‌تایبه‌تی هه‌یه‌؟
هیوادارم حیزبه‌کانی کوردستانی رۆژهه‌ڵات، به‌ خۆیاندا بێنه‌وه‌ و بیر له‌وه‌ بکه‌نه‌وه‌ ئه‌مه‌ رۆژ نییه‌ ئه‌وانی تێکه‌وتوون! ئێمه که‌ میوانین‌ له‌م پارچه‌یه‌، قورسایی سیاسیمان نه‌ماوه‌ و رێزمان هاتۆته‌ خوارێ و بوویین به‌ تانه‌ی دۆست و دوژمن، رۆژ رۆژی یه‌کگرتن و خه‌باته‌ بۆ ده‌سته‌به‌رکردنی داواکارییه‌کانی گه‌لی کورد له‌ کوردستانی رۆژهه‌ڵات، ئه‌گه‌ر ئه‌م پرسگرێکه‌ به‌ هه‌ند وه‌رنه‌گرن، کورد هه‌ر ده‌مێنێ و له‌ناو ناچێ، ئه‌وه‌ی که‌ له‌ناو بچێ و تووشی کێشه‌ ببێ، ته‌نیا حیزبه‌کانن، که‌وابوو، هیوادارم وه‌ڵامی خواست و ویسته‌کانی کۆمه‌ڵگای کورده‌واریی بده‌نه‌وه‌ و به‌رژه‌وه‌ندیی کوردستان له‌ سه‌رووی هه‌موو شتێکه‌وه‌ بێ بۆیان. خواستی کورد ئه‌مڕۆ رزگاریی کوردستانه‌، داوای خۆدموختاریی بکه‌ی، داوای فیدراڵیه‌ت بکه‌ی، داوای هه‌ر شتێکی دیکه‌ بکه‌ی له‌ پێوه‌ندی له‌گه‌ڵ کێشه‌ی کورددا، هه‌ر لێت ده‌ده‌ن و ده‌تکوژن و تاوانبار و ته‌جزیه‌ته‌ڵه‌بی، سا باشتر ئه‌وه‌یه‌ کڵاو له‌ سه‌ر خۆیان نه‌نێن و وه‌ڵامده‌ری خواست و ویسته‌کانی کۆمه‌ڵگای کورده‌واریی بن. به‌ هیوای ئه‌و رۆژه‌ و به‌ هیوای ده‌ستپێکردنه‌وه‌ی خه‌باتێکی گه‌رمووگوڕتر.


له‌گه‌ڵ رێز و سوپاس و پێزانین
ئه‌گه‌ر بۆتان کرا، ره‌سمێکی خۆتانمان بۆ له‌گه‌ڵ وه‌ڵامه‌کان بنێرن‌
چاوه‌ڕوانی وه‌ڵامه‌کانی به‌ڕێزتانین
بڵاوکراوه‌ی "بۆکوردستان"
15/7/2008
Bo.kurdistan@yahoo.com
www.pazadik.com
07504092818




          Design by Chia
Biyografi Film