Strict Standards: Only variables should be passed by reference in /customers/a/1/3/razzazi.se/httpd.www/inc/functions.inc.php on line 489 Razzazi
Strict Standards: Only variables should be passed by reference in /customers/a/1/3/razzazi.se/httpd.www/inc/show.news.php on line 140 Strict Standards: Only variables should be passed by reference in /customers/a/1/3/razzazi.se/httpd.www/inc/functions.inc.php on line 548 Strict Standards: Only variables should be passed by reference in /customers/a/1/3/razzazi.se/httpd.www/inc/functions.inc.php on line 549 Strict Standards: Only variables should be passed by reference in /customers/a/1/3/razzazi.se/httpd.www/inc/functions.inc.php on line 563 Strict Standards: Only variables should be passed by reference in /customers/a/1/3/razzazi.se/httpd.www/inc/functions.inc.php on line 489

خه‌ڵکی فارس، وه‌کوو هۆزێکی چیانشین چاو له‌ کورد ده‌که‌ن و کورد به‌ نه‌ته‌وه‌ نازانن‌!

تا ئێستا بیستووتانه‌ عه‌شیره‌تێكی ئافریقایی یان نه‌ته‌وه‌یێكی دیكه‌ی سه‌ر ئه‌م چوار قوڕنه‌یه‌ی دنیا، زمانی دایكیی خۆی لێ قه‌ده‌خه‌ كرابێ، جگه‌ له‌ كورد نه‌بێ؟!

ئێمه‌ی كوردی کوردستانی رۆژهه‌ڵات، زمانه‌كه‌مان لێ قه‌ده‌خه‌ كراوه‌، بۆمان نییه‌ وه‌كوو ئینسان بیروڕای خۆمان به‌ زمانی زگماکیی خۆمان ده‌رببڕین، له‌ هه‌موو مافێكی ئینسانیی بێبه‌شین و زمانه‌که‌مان له‌ ئێراندا به‌ زمانی (غه‌یری ره‌سمی) دانراوه، واته‌ قه‌ده‌خه‌یه‌ قسه‌ی پێ بکه‌ین!! منداڵی کوردی بنده‌ست، که‌ دایکه‌که‌ی به‌ لایه‌لایه‌ی کوردیی به‌خێوی ده‌کا، دوای شه‌ش ساڵ که‌ ده‌چێته‌ مه‌دره‌سه‌، به‌ زمانێکی دیکه‌ په‌روه‌رده‌ی ده‌که‌ن و مافی ئه‌وه‌ی نییه‌ وه‌كوو ئینسان له‌ زمانه‌که‌ی خۆی که‌ڵک وه‌ربگرێ و زمان و فه‌رهه‌نگێكی دیكه‌ی له‌ سه‌ر زاڵ ده‌که‌ن و بنده‌ست و ژێرچه‌پۆكه‌ باری دێنن، ئه‌ویش له‌ ئێرانی ژێربه‌رانی کۆماری ئیسلامیدا‌!

ئه‌م پاودانه‌ ده‌گاته‌ راده‌یه‌ك،‌ که‌ زمانه‌که‌ی، له‌به‌رچاو ده‌خه‌ن و وای لێدێ، هه‌موو شتێکی خۆی له‌به‌رچاو ده‌که‌وێ و بوونی خۆشی له‌لا وه‌کوو کوردێک بێنرخ و بێ بایه‌خ دێته‌ به‌رچاو! کاره‌سات ئه‌و کاته‌یه‌ که‌ ئیتر ئه‌و منداڵه‌، پێی لۆمه‌ و شووره‌ییه‌ بڵێ کوردم: به‌كورتی زمان و فه‌رهه‌نگ و ئه‌ده‌ب و هونه‌ری نه‌ته‌وه‌ی باڵاده‌ست و داگیركه‌ر، ئه‌وه‌نده‌ به‌ سه‌ریدا زاڵ ده‌بێ که‌ هه‌ستی نه‌ته‌وایه‌تی تێدا کوێر ده‌بێته‌وه‌ و ناتوانێ بوونی خۆی بسه‌لمێنێ. له‌ سه‌رده‌می شای ده‌رکراو، له‌ کوردستانی بنده‌ستی ئێران، زۆركه‌س له‌و باوه‌ڕه‌دا بوون، زمانی كوردیی بۆ ئه‌وه‌ نا‌بێ‌ قسه‌ی پێ بكرێ، ته‌نانه‌ت هه‌ندێكیش هه‌بوون‌ به‌ خه‌و نه‌یانده‌دیت زمانی كوردیی بۆ خوێندن و نووسین ده‌ست بدا، له‌و باوه‌ڕه‌شدا نه‌بوون رۆژێک گه‌لی کورد ببێ به‌ خاوه‌نی ته‌له‌ڤزیۆن!

ئه‌مانه‌ هه‌مووی كاریگه‌ریی زمان و فه‌رهه‌نگی نه‌ته‌وه‌ی سه‌رده‌ست و ده‌سه‌ڵاتی حاكم بوون له‌ كوردستان، كه‌ له‌ رێگای مه‌دره‌سه‌ و رادیۆ و ته‌له‌ڤزیۆن و ئورگانه‌كانی دیكه‌ی ده‌وڵه‌ته‌وه‌، جگه‌ له‌ هه‌وڵ و ته‌قه‌لا و كۆششی ساواك و ده‌زگاكانی تری ده‌وڵه‌ت له‌ کوردستانی بنده‌ستی ئێران بۆ سه‌رکوتکردنی جموجووڵی کورد، به‌ سه‌ر كورددا سه‌پێنرابوو.


خه‌ڵکی کورد له‌ کوردستانی بنده‌ستی ئێران، خوازیاری ئه‌وه‌یه‌ گیروگرفتی سیاسی، کۆمه‌ڵایه‌تی، ئابووریی، فه‌رهه‌نگیی و هیدیکه‌ی، خۆی چاره‌سه‌ری بکا و که‌س راوێن (تصمیم)ی بۆ نه‌گرێ و بڕیاری بۆ نه‌دا، به‌ڵام هه‌میشه‌ به‌ چه‌ک و فیشه‌ک وه‌ڵامی دراوه‌ته‌وه‌ و به‌ هاووڵاتی پله‌ دوو و سێش دانه‌نراوه‌ و هیچ حیسابێکی بۆ نه‌کراوه و له‌ هوموو بوارێکدا راچاو (کۆنترۆڵ) کراوه و له‌ ژێر چاوه‌دێرییدا بووه‌!

2500 ساڵه‌ کورد بنده‌ستی ده‌سه‌ڵاتی فارسه‌ و به‌ زمانی فارسیی له‌ناومان ده‌به‌ن‌، 2500 ساڵه‌ خه‌ڵکی کورد له‌ کاروباری ناوخۆی نیشتمانه‌که‌ی خۆیدا هیچ نه‌خش و ده‌ورێکی نییه‌ و له‌گه‌ڵ هه‌ر ئێرانییه‌ک‌ قسه‌ ده‌که‌ی، یه‌کسه‌ر به‌ (تجزیه‌ طلب)ت داده‌نێ و به‌ (اقلیت قومی)ت ناو ده‌با، و به‌ مۆسیقاکه‌شمان که‌ له‌ باری پێشینه‌ و مێژووه‌وه‌ زۆر له‌ فارسیی کۆنتره‌، ده‌ڵێن: (موسیقی محلی) و، ده‌یان ناو و ناتۆره‌ی دیکه‌! له‌ کاتێکدا یه‌کێ له‌ کۆڵه‌که‌ گرنگه‌کانی مۆسیقای ئێرانیی و ته‌نانه‌ت فارسیش، مۆسیقای کوردییه‌ و زۆرێک له‌ ژه‌نیاره‌ به‌ناوبانگه‌کانی ئێران کوردن!

ئه‌م بنده‌ستیی و نابه‌رابه‌ریی و سته‌مکاریی و زۆربێژییه‌،‌ خه‌ڵکی کوردی به‌ره‌و خه‌بات و تێکۆشان هانداوه‌ و تووشی کێشه‌ی گه‌وره و سامناکی کردووه‌. به‌شێکی ئه‌م کێشه‌ و گیر و گرفتگه‌له‌، ده‌گه‌ڕێنه‌وه‌ بۆ ئه‌وه‌ که،‌ رێکخراو و حیزبه‌کانی کوردستانی رۆژهه‌ڵات نه‌یانتوانیوه‌ له‌ ماوه‌ی خه‌باتی خۆیاندا کورد به‌ گه‌لانی دیکه‌ی ئێران بناسێنن، تا‌ لانیکه‌م ئاوه‌ها چاومان لێ نه‌که‌ن! فارس زۆر سووک و نزم چاو له‌ کورد و نه‌ته‌وه‌کانی بنده‌ستی ئێران ده‌که‌ن! وه‌کوو ئۆپۆزیسیۆنیش ئه‌گه‌ر بانگ کرابێتنه‌ ته‌له‌ڤزیۆنه‌ فارسییه‌کان بۆ گوتوبێژ، ته‌له‌ڤزیۆنه‌کانی دیکه‌ با بوه‌ستێ، زمانیان نه‌هاتۆته‌ گۆ بڵێن: ئێمه‌ کوردین، نه‌ته‌وه‌یێکین پێشینه‌مان له سه‌ر ئه‌م خاکه‌ له‌ فارس کۆنتره‌، به‌ڵام هیچ مافێکمان پێ ره‌وا نابینن، زمانه‌که‌مان لێ قه‌ده‌خه‌ کراوه‌ و به‌ هاووڵاتی پله‌ سێشمان نازانن و ئێوه‌ بوونه‌ته‌ هۆ ئێمه‌ به‌ (تجزیه‌ طلب) ناو ببریێن و هه‌ر ئێوه‌شن‌ له‌ داهاتوودا ئێران به‌ره‌و پارچه‌پارچه‌بوون ده‌به‌ن نه‌ک ئێمه‌!

من له‌و حیزبانه‌ی کوردستانی رۆژهه‌ڵات، به‌تایبه‌ت ئه‌وانه‌ی که‌ خۆیان به‌ چه‌پ ده‌زانن و خزمه‌تی شۆڤینیستی فارس ده‌که‌ن، ده‌پرسم: کاتێ‌ کۆماری ئیسلامی ئێران، ئه‌و هه‌مووه‌ خه‌ڵکه‌ی له‌ کوردستانی بنده‌ستی ئێران قه‌ڵاچۆ کرد و شار و گوند نه‌ما بۆمبارانی نه‌کا، کام یه‌ک له‌ حیزبه‌ پێشکه‌وتووه‌کانی ئێران که‌ هه‌میشه‌ دڵیان بۆ (یه‌کپارچه‌یی خاکی ئێران) لێده‌دا، پشتیوانییان له‌ کوردی کوردستانی رۆژهه‌ڵات کرد؟!

کامه‌ نووسه‌ر و رۆشنبیری فارس و ئازه‌ری و تورکه‌مه‌ن و به‌لووچ و عه‌ره‌ب و گیله‌ک و لوڕ، له‌ کاتی ره‌وه‌ مێژوویییه‌که‌ی کوردستانی باشوور، که‌ نزیکه‌ی 5000 ئینسانی کورد له‌ سوید کۆ بووینه‌وه‌ بۆ مه‌حکوومکردنی ئه‌و جه‌نایه‌ته‌، هات و هاوده‌ردیی له‌گه‌ڵ کردین؟! باشه‌ هه‌تا ئێستا ئه‌م حیزبانه‌ ئه‌مه‌یان بۆ روون نه‌بۆته‌وه که‌ ئه‌مه‌ هه‌ڵوێستی هاوخوێنانی فارسه‌ له‌گه‌ڵ کوردی بنده‌ستی ئه‌وان؟! ئه‌م حیزبانه‌ که‌ 20 ئه‌ندامی فارسیان نییه‌، بۆ کێ خه‌بات ده‌که‌ن و بۆچی تێده‌کۆشن؟

کاتێک‌ هه‌ڵه‌بجه‌ بۆمباران کرا و ئه‌نفال ده‌ستی پێکرد، ئه‌و سه‌رده‌مه‌، چه‌ندین حیزبی کوردیی و ئێرانیی له‌ ئێراق ده‌ژیان و خۆیان به‌ ئێرانیی ده‌زانی و پێوه‌ندیی دیلۆماسییان له‌گه‌ڵ حکوومه‌تی به‌عس هه‌بوو و خۆیان به‌ ئازا و شۆڕشگێڕ ده‌زانی، که‌چی هیچکامێکیان هه‌ڵوێستێکیان نه‌‌نواند؟! چه‌ندین خۆپیشاندان و کۆڕ و کۆبوونه‌وه‌ له‌ ده‌ره‌وه‌ی وڵات بۆ پرسگرێکی کێشه‌ی کوردستانی باشوور به‌ڕێوه‌ چوو، چه‌پی کوردستانی رۆژهه‌ڵات نه‌ ته‌نیا به‌شدارییان نه‌کرد، به‌ڵکوو گاڵته‌شیان به‌ بارودۆخه‌که‌ ده‌کرد، له‌ کاتێکدا به‌ پاره‌ی حیزبه‌کانیی کوردستانی باشوور به‌ڕێوه‌ ده‌چوون. به‌ داخه‌وه‌ ئه‌مه‌ بوو‌ فه‌رهه‌نگی سیاسیی چه‌پی ئێران و کوردستانی رۆژهه‌ڵات! له‌ کاتێکدا چه‌پێک که‌ نه‌ته‌وه‌که‌ی خۆی ناسیبێ و له‌ چه‌پ تێگه‌ییشتبێ، ئاوه‌ها بیر ناکاته‌وه‌!

حیزبه‌کانی ئێمه‌ زۆر تاوانبارن، ئه‌مڕۆ به‌ داخه‌وه‌، توركیه‌ و ئێران و ئێراق و سووریه‌، خاوه‌نی كوردستانن و حیزبه‌كانیشمان كوردستانیان به‌ستۆته‌وه‌ به‌و وڵاتانه‌وه‌ و كورد بۆ خۆی بێخاوه‌ن و بێكوردستان ماوه‌ته‌وه‌! له‌ ئه‌ده‌بیاتی سیاسیشیاندا كاتێ كه‌ ناوی كوردستان دێنن، به‌ جێگای ئه‌وه‌ی‌ بڵێن: كوردستانی بنده‌ستی ئێران یان رۆژهه‌ڵاتی كوردستان، یا کوردستانی رۆژهه‌ڵات، ده‌ڵێن: كوردستانی ئێران!، که‌ ئه‌مه‌ بۆ خۆی دان پێدانان و لکاندنی کوردستانه‌ به‌ ئێرانه‌وه‌، له‌ کاتێکدا خه‌باتیشی بۆ ده‌که‌ن، ئه‌وه‌یه‌ ده‌ڵێن: سیاسه‌ت به‌رژه‌وه‌ندییه‌ و ئه‌خلاق نییه‌! له‌ زۆربه‌ی گوتوبێژه‌کانیاندا باس له‌ کێشه‌ی کورد ناکه‌ن و خۆشیان نازانن چییان ده‌وێ؟ له‌ دوای کۆماری کوردستان له‌ مه‌هاباد‌ و هه‌تا ئه‌و کاته‌ش که‌ شۆڕشی به‌ناو گه‌لانی ئێران ده‌ستی پێکرد و له‌ (ماکۆ و سه‌ڵماس و ورمێ، هه‌تا سه‌حه‌نه‌ و کرند و کرماشان)، به‌ ده‌ستمانه‌وه‌ بوو، نه‌ کۆمه‌ڵه‌ و نه‌ دێمۆکرات، ئاڵایه‌کی کوردستانیان له‌ شوێنێک هه‌ڵنه‌کرد و خه‌یابان یا کۆڵانێکیان به‌ ‌ناوی خه‌باتکارێکی گیانبه‌ختکردووی کورده‌وه‌ تۆمار نه‌کرد و به‌ داخه‌وه‌ که‌وتنه‌ دووی کڵاوی بابردوو! دوای چه‌ندین ساڵ خه‌بات، ئه‌وه‌ حیزبی دێمۆکرات دووجار قه‌ڵشیان تێکه‌وت و له‌یه‌ک جوێ بوونه‌وه‌ و بوون به‌ دوو به‌ش، ئه‌وه‌ کۆمه‌ڵه‌ بوو به‌ پێنج به‌ش! سازمانی خه‌بات و‌ یه‌کیه‌تی شۆڕشگێڕانیش بوون به‌ دوو به‌ش، ئه‌وه‌ش حیزبی کومۆنیستی ئێران، له‌گه‌ڵ رێزمدا بۆیان، چه‌ندین ساڵه‌ ئه‌و حیزبه‌یان وه‌کوو لاشه‌یێکی مردوو، داوه‌ به‌ سه‌ر شانیاندا‌، که‌ نه‌ ده‌توانن فڕێی بده‌ن، نه‌ ده‌توانن له‌ ژێر خاکدا‌ بیشارنه‌وه‌، هه‌ر وه‌ها به‌ سه‌ر شانیانه‌وه‌ بۆگه‌نی کردووه‌ و ماوه‌ته‌وه و‌ هه‌تا ئێستاش وه‌کوو حیزبێکی ئێرانیی، (20) ئه‌ندامی فارسیان نییه‌، که‌چی خه‌وی ئه‌وه‌ ده‌بینن: له‌ داهاتوودا کۆماری ئیسلامی بڕووخێنن، ئه‌وسا بڕۆنه‌ تاران حکوومه‌تی ئێران بگرنه‌ ده‌ست، له‌ کاتێکدا فارس ئێمه‌ به‌ ژێرماڵه‌ و چیانشین و پێشمه‌رگه‌ی موسڵمان و مه‌رزداری غه‌یوور ناو ده‌با‌!

کاتێک هاوخوێنانی فارس، کورد به‌ نه‌ته‌وه‌ دانانن و به‌ هاووڵاتی پله‌ سێشی نازان و، جیا له‌وه‌ش هه‌تا ئێستا ئه‌م حیزبانه‌ به‌ چه‌پ و راسیانه‌وه‌ نه‌تانتوانیوه‌ کورد به‌و نه‌ته‌وه‌گه‌له‌ی ناو ئێران بناسێنن، چۆن ده‌توانن مافی ئه‌و نه‌ته‌وه‌یه‌ له‌م وڵاته‌ ده‌سته‌به‌ر بکه‌ن؟! به‌داخه‌وه‌ مێژووی حیزبایه‌تی له‌لای ئێمه‌ پێشینه‌یێکی وای نییه‌ و کورد له‌ حیزبی تووده‌وه‌ فێری حیزبایه‌تی بووه‌ ئه‌ویش حیزبایه‌تییه‌کی سه‌قه‌ت و ناله‌بار.

مامۆستا هێمن، شاعیری نه‌ته‌وه‌یی کورد ده‌ڵێ:
له‌ مه‌یدانــــی شـــه‌ڕانخێــوی خه‌باتــــــــی چه‌رخی بیستـــه‌مدا
سه‌رم سووڕ ما، که‌ ئه‌سپی سووکه‌سوواری کوردیی بۆ وه‌ستان
وه‌ڵامــــــــــی دامـــــــــه‌وه‌ پیرێکـــــــی ئازاده‌ی جیهـــــــاندیـــــــده‌
خه‌تای سوواران نه‌بوو، پێشسوواره‌کانمان قورس و ناوه‌ستان!

گه‌لی کورد راسته‌ بنده‌ست و په‌رێشانه‌ و کێشه‌ی زۆره‌ له‌م کاته‌دا، به‌ڵام ده‌بێ ئه‌وه‌ بزانێ که‌ تازه‌ ئیتر وه‌کوو نه‌ته‌وه‌یه‌ک بوونی هه‌یه‌ و تێدا ناچێ، له‌ کۆندا داگیرکه‌رانی کوردستان و ده‌سه‌ڵاته‌ یه‌ک له‌ دوای یه‌که‌کانیان، هه‌وڵی زۆریان دا‌ کورد له‌ناو به‌رن، هه‌رچه‌ند حیزبه‌چه‌په‌کان که‌متازۆر و ناراسته‌وخۆ یارمه‌تی شۆڤینیستی فارسیان دا، به‌ڵام کورد توانی به‌ هه‌ر کوێره‌وه‌ریی و چه‌رمه‌سه‌رییه‌ک بێ، خۆی له‌ فه‌وتان و له‌ناوچوون رزگار بکا، راسته‌ زه‌بری گه‌وره‌ و گورچووبڕیشی وێکه‌وتووه‌ و له‌ زۆر باره‌وه‌ تووشی کێشه‌ و گیروگرفتی سامناک هاتووه‌، به‌ڵام تازه‌ گه‌ییشتۆته‌ قۆناخێکی دیکه‌ و من له‌و باوه‌ڕه‌دام‌ ئه‌مڕۆ زۆربه‌ی خه‌ڵكی كورد ژیرانه‌ بیر ده‌كه‌نه‌وه‌، به‌ڵام ته‌نیا حیزبه‌کانن که‌ له‌ناو ئه‌و گێژه‌نه‌دا ماونه‌ته‌وه و نازانن کورد چی ده‌وێ!

كوردستان و كۆمه‌ڵگای كورده‌واریی گۆڕانی به‌سه‌ردا هاتووه‌، دنیا به‌ هۆی گه‌شه‌ی ته‌کنیکه‌وه‌ بۆته‌ شارێکی بچووک، خه‌ڵک و گه‌نجی ئه‌مڕۆ له‌ حیزبه‌کان زۆر پێشکه‌وتووترن، چونکه‌ خه‌بات بۆ ئازادیی و دێمۆكراسی، شانبه‌شانی بزووتنه‌وه‌ کۆمه‌ڵایه‌تی و سیاسییه‌كانی دیكه‌ی دنیا، وه‌كوو مافی ئینسان و به‌رابه‌ریی نه‌ته‌وه‌کان و مافی دیاریكردنی چاره‌نووس، رۆژ له‌گه‌ڵ رۆژ، به‌هێزتر بووه‌. بیگومان ئه‌م گۆڕانانه‌ش له‌ سه‌ر كورد و خه‌باته‌كه‌ی بێكاردانه‌وه‌ نه‌بووه‌ و كۆمه‌ڵگای كورده‌واریی وشیار بۆته‌وه‌ و خه‌ڵک له‌ خه‌و راپه‌ڕیوه‌ و وه‌کوو زانای گه‌وره‌ی تورک سمایل بێشکچی ده‌ڵێ: جێگای خۆشحاڵیی و سه‌ركه‌وتنه‌ كه‌ ئێستا ئیتر کورد به‌وه‌ گه‌ییشتووه‌: كۆیله‌ و بنده‌سته‌، ناو و ناسنامه‌ی ناقانوونییه‌ و توانای ئه‌وه‌ی نییه‌ باسی وڵاته‌كه‌ی، كه‌ چوار هه‌زار ساڵ زیاتره‌ به‌ سه‌ریه‌وه‌ ده‌ژی بكا. گه‌لێكی 40 ملیۆنیی كه‌رامه‌تی ئینسانیی لێ داته‌كێنراوه‌ و سووكایه‌تیی پێ ده‌كرێ و بۆی نییه‌ به‌ زمانی زگماكی خۆی نه‌ ته‌نیا بخوێنێ و بنووسێ، ته‌نانه‌ت ناتوانێ قسه‌ش بكا. به‌ كورتیی وایان لێكردووه‌، كه‌ خۆی خه‌یانه‌ت به‌ خۆی ده‌كا و باوه‌ڕی به‌ خۆی نییه‌ و زمان و كولتوورێكی دیكه‌ی له‌ سه‌ر زاڵه‌ و ئه‌وه‌ی خۆی به‌ هیچ و به‌ كه‌م ده‌زانێ. هه‌ر ئه‌وه‌ش وای لێكردووه‌ به‌ره‌و هه‌ڵدێری نه‌مانی به‌رێ. ئێستا گه‌لی كورد له‌وه‌ زۆر هه‌ست به‌ شه‌رم ده‌كا‌ وابه‌سته‌یه‌ به‌ كۆمه‌ڵگایه‌كی دیكه‌ و كۆیله‌ و بنده‌ستی نه‌ته‌وه‌یێكی دیكه‌یه‌ كه‌ نه‌ته‌وه‌ی سه‌رده‌سته‌!

کورد له‌ کوردستان جگه‌ له‌و‌ چواربه‌شه‌ داگیركراوه‌ی بنده‌ستی ئێران و ئێراق و تورکیه‌ و سووریه‌، له‌ چه‌ندین وڵاتی دیكه‌ی دنیادا نیشته‌جێیه‌، یان باشتر و درووستر بڵێم: هه‌ڵداژراونه‌ته‌ چه‌ندین وڵات: خوراسان، ئازه‌رباییجانی شووره‌وی، ئه‌رمه‌نستان، گورجستان، قه‌زاقستان، ئوزبه‌كستان، توركمه‌نستان، قرقیزستان، ئه‌فغانستان، پاكستان، ئه‌لجه‌زایر، مه‌راكش، لوبنان، چین و ئافریقا و زۆر شوێنی دیكه‌، كه‌ ژیانیان پڕه‌ له‌ سه‌گمه‌رگیی و چاره‌ڕه‌شیی. وه‌کوو به‌ڕێز دوکتۆر سمایل بێشکچی ده‌ڵێ: لێره‌دایه‌ كه‌ ده‌بێ بپرسین: ئاخۆ ئه‌م كوردانه‌ چۆن گه‌ییشتنه‌ ئه‌وێ؟! هه‌ڵداژران و كۆچی زۆره‌ملیی ئه‌مانه‌ چده‌لیلێكی هه‌بووه‌؟! گه‌لێكی 40 ملیۆنی چۆن چۆته‌ ژێر باری ژیانێكی ئاوه‌ها پووچ و بێبه‌هره‌ی به‌ بێ هیچ مافێكی ئینسانیی؟! بۆچی كورد به‌م رۆژه‌ گه‌ییشت، ئه‌مانه‌ هه‌موو پرسن و ده‌بێ وه‌ڵام بدرێنه‌وه، به‌ڵام به‌ داخێکی گرانه‌وه‌، هه‌تا وه‌کوو ئێستا، ئه‌م حیزبانه‌ی ئێمه‌ نه‌یانتوانیوه‌ وه‌ڵامی ئه‌م پرسگرێکانه‌ بده‌نه‌وه‌!

خه‌ڵكی كورد ده‌بێ خه‌باتێكی وا له‌ ئه‌ستۆ بگرێ بیگه‌یێنێ به‌ ئامانجه‌كانی. ئه‌و خه‌باته‌ ده‌بێ خه‌باتێك بێ كه‌ كۆمه‌ڵگای نێونه‌ته‌وه‌یی پرسگرێكه‌كه‌ی ده‌رك بكا و لێی بكۆڵێته‌وه‌. ئه‌و خه‌باته‌ش بۆ ئێمه‌ له‌م سه‌رده‌مه‌دا، ته‌نیا خه‌باتی نه‌ته‌وایه‌تیی سووسیالیستییه‌. نه‌ خه‌باتی چه‌په‌، نه‌ خه‌باتی راست، ئه‌م خه‌باته‌ به‌ر له‌ هه‌موو شتێ، خه‌باته‌ بۆ به‌رابه‌ریی و ئازادیی و دێمۆكراسی. نه‌ته‌وه‌یێکی بنده‌ستی وه‌کوو کورد،‌ له‌ رێگای خه‌باتی ئاوه‌هاو‌ه‌ زۆرتر ده‌توانێ‌ بگا به‌ ئامانج. ئێمه‌ ئه‌گه‌ر نیشانی بده‌ین كوردین، خاوه‌ن زمان و ئه‌ده‌ب و هونه‌ر و فه‌رهه‌نگی تایبه‌ت به‌ خۆمانین، خاكه‌كه‌مان دابه‌ش كراوه‌، هه‌موو ئه‌م ماف و دیارده‌ خۆڕسكانه‌ی خۆمان لێ زه‌وت كراوه‌، ناهێڵن كه‌ڵكیان لێ وه‌رگرین و به‌ زمانی نه‌ته‌وه‌یێكی دیكه‌ كه‌ حكوومه‌ته‌كه‌ی داگیركه‌رمانه‌، ده‌نووسین و ده‌خوێنین و ئێستاش بۆ ئه‌وه‌ خه‌بات ده‌که‌ین که‌ ئه‌و مافانه‌ ده‌سته‌به‌ر بکه‌ین و کوردستان به‌ره‌و رزگاریی به‌رین و داوای ده‌وڵه‌تێکی کوردیی بکه‌ین، زۆرتر خه‌باته‌كه‌مان ده‌ناسرێ، چونکه‌ ئه‌مه‌ پرسگرێکه‌ به‌ كرده‌وه‌ له‌ هه‌نده‌ران بۆ هه‌موو كوردێك هاتۆته‌ پێش و تاقی كراوه‌ته‌وه‌.

هیوادارم حیزبه‌کانی کوردستانی رۆژهه‌ڵات، به‌ خۆیاندا بێنه‌وه‌ و بیر له‌وه‌ بکه‌نه‌وه‌ ئه‌مه‌ رۆژ نییه‌ ئه‌وانی تێکه‌وتوون! ئێمه که‌ میوانین‌ له‌م پارچه‌یه‌، قورسایی سیاسیمان نه‌ماوه‌ و رێزمان هاتۆته‌ خوارێ و بوویین به‌ تانه‌ی دۆست و دوژمن، رۆژ رۆژی یه‌کگرتن و خه‌باته‌ بۆ ده‌سته‌به‌رکردنی داواکارییه‌کانی گه‌لی کورد له‌ کوردستانی رۆژهه‌ڵات، ئه‌گه‌ر ئه‌م پرسگرێکه‌ به‌ هه‌ند وه‌رنه‌گرن، کورد هه‌ر ده‌مێنێ و له‌ناو ناچێ، ئه‌وه‌ی که‌ له‌ناو بچێ و تووشی کێشه‌ ببێ، ته‌نیا حیزبه‌کانن، که‌وابوو، هیوادارم وه‌ڵامی خواست و ویسته‌کانی کۆمه‌ڵگای کورده‌واریی بده‌نه‌وه‌ و به‌رژه‌وه‌ندیی کوردستان له‌ سه‌رووی هه‌موو شتێکه‌وه‌ بێ بۆیان. خواستی کورد ئه‌مڕۆ رزگاریی کوردستانه‌، داوای خۆدموختاریی بکه‌ی، داوای فیدراڵیه‌ت بکه‌ی، داوای هه‌ر شتێکی دیکه‌ بکه‌ی له‌ پێوه‌ندی له‌گه‌ڵ کێشه‌ی کورددا، هه‌ر لێت ده‌ده‌ن و ده‌تکوژن و تاوانبار و ته‌جزیه‌ته‌ڵه‌بی، سا باشتر ئه‌وه‌یه‌ کڵاو له‌ سه‌ر خۆیان نه‌نێن و وه‌ڵامده‌ری خواست و ویسته‌کانی کۆمه‌ڵگای کورده‌واریی بن. به‌ هیوای ئه‌و رۆژه‌ و به‌ هیوای ده‌ستپێکردنه‌وه‌ی خه‌باتێکی گه‌رمووگوڕتر.
ناسری ره‌زازی دووکان 12/6/2008




          Design by Chia
Biyografi Film